காலநிலையியல் (Climatology) - காற்றின் வகைகள் பகுதி 1

காற்றின் வகைகள் பகுதி 1

a. நிலையான அல்லது கோள் காற்றுகள்
•    இக்காற்றுக்ள புவி முழுவதிலும் வீசுகின்றது. புவியின் வெவ்வேறு அட்சப்பகுதிகளில் ஏற்படும் வெப்ப மற்றும் அழுத்த வேறுபாட்டின் காரணமாக இக்காற்றுகள் தோன்றுகின்றன.
•    கோள் காற்றுகள் ஆண்டு முழுவதும் தொடர்ந்து ஒரு குறிப்பிட்ட திசையிலிருந்து ஒரு குறிப்பிட்ட திசையை நோக்கி அதிக அழுத்தப்பகுதியிலிருந்து, குறைவழுத்தப் பகுதியை நோக்கி வீசுகின்றன. இக்காற்றுகள் இவை வீசும் திசையின் அடிப்படையில் அழைக்கப்படுகின்றது.
•    எடுத்துக்காட்டாக கிழக்கு திசையிலிருந்து வீசும் காற்றுக்களை கிழக்குக் காற்றுகள் என்று குறிப்பிடுகின்றோம்.
•    புவியின் மூன்று கோள் காற்றுகள் வீசுகின்றன. அவை
1. கிழக்குக் காற்றுகள் அல்லது வியாபாரக் காற்றுகள்
2. மேற்கு காற்றுகள் அல்லது எதிர் வியாபாரக் காற்றுகள் மற்றும்
3. துருவக் காற்றுகள் ஆகும்.

1. கிழக்கு காற்றுகள் அல்லது வியாபாரக் காற்றுகள்
•    பூமத்தியரேகைப் பகுதியில் அதிக வெப்பத்தினால் குறைவழுத்தம் உருவாகின்றது. பூமத்தியரேகை குறைவழுத்த மண்டலத்திற்கு வடக்கிலும், தெற்கிலும் துணை வெப்ப அதிக அழுத்த மண்டலம் உள்ளது. 

•   எனவே, இவ்விரு அழுத்த மண்டலங்களிலிருந்து காற்று பூமத்தியரேகை குறைவழுத்த மண்டலத்தை நோக்கி வீசுகின்றது.
•    இக்காற்றுகள் முறையே வடக்கிலிருந்து தெற்காக வட அரைக்கோளத்திலும் தெற்கிலிருந்து வடக்காக தென் அரைக்கோளத்திலும் வீசுகின்றது. புவியின் சுழற்சி காரணமாக வட அரைக்கோளத்தில் இக்காற்று கிழக்காகவும் திசை திருப்பப்பட்டு வீசுகின்றது. 

•   எனவே இக்காற்றுகள் கிழக்குக்காற்றுகள் என அழைக்கப்படுகின்றன. கிழக்கு காற்றுகள் பாய்மரக்கப்பலின் பயணத்திற்கு மிகவும் சாதகமாக இருந்தன. இதனால் இக்காற்றுகளை "வியாபாரக் காற்றுகள்" என்று அழைப்பர்.
 

2. மேற்கு காற்றுகள்
•    துணை வெப்ப அழுத்த மண்டலங்களில் இருந்து துணை துருவ மண்டலங்களை நோக்கி வீசும் காற்றுகள் "மேற்கு காற்றுகள்" எனப்படும். இவை 40° அட்சம் முதல் 60° வரை இரண்டு அரைக்கோளங்களிலும் வீசுகின்றது.
•    நிலப்பரப்பின் மீது காணப்படும் குன்று, மலை, பீடபூமி போன்ற நிலத்தோற்றங்களும், தாவரங்களும் காற்று சீராக வீசுவதற்கு தடையாக உள்ளன. ஆனால் நீர்ப்பரப்பிலோ இவ்வித தடைகள் எதுவும் இல்லை. ஆதலால் நீர்ப்பரப்பின் மீது காற்றுகள் சீராகவும், வேகமாகவும் வீசுகின்றன.
•    வட அரைக்கோளத்தின் நிலப்பரப்பு அதிகமாக உள்ளதால் அவற்றிலுள்ள மலைகள், பீடபூமிகள் இவற்றால் காற்றின் திசை வேகமும், தொடர்ச்சியும் பாதிக்கப்படுகின்றன. 

•   தென் அரைக்கோளத்தில் பெரும்பகுதி நீர்பரப்பை கொண்டுள்ளது. எனவே தென்அரைக்கோளத்தில் இக்காற்றுகள் அதிவேகத்துடனும், தொடர்ச்சியாகவும் வீசுகின்றது. 

•   எனவே 40° தென் அட்சத்தில் இக்காற்று மிக வேகமாகவும், பெரும் சப்தத்துடனும் வீசுகின்றது. இதனால் இப்பகுதியில் வீசும் மேற்குக் காற்று "கர்ஜிக்கும் நாற்பது" என அழைக்கப்படுகிறது.

3. துருவக் கிழக்கு காற்றுகள்
•    துருவ உயர் அழுத்த மண்டலத்திலிருந்து துணை துருவ குறைவழுத்த மண்டலத்தை நோக்கி வீசும் காற்றுகள் துருவக் கிழக்குக் காற்றுகள் எனப்படும். இக்காற்று மிக குளிர்ச்சியாகவும், அடர்த்தி மிகுந்ததாகவும் உள்ளது.

b. பருவக் காற்றுகள்
•    ஒரு நாளின் ஒரு பகுதியில் அல்லது ஒரு ஆண்டின் ஒரு பகுதியில் ஒரு குறிப்பிட்ட திசையில் வீசும் காற்று, அந்நாளின் அல்லது ஆண்டின் மறுபகுதியில் எதிர்திசையில் வீசுவதையே பருவக்காற்றுகள் என்கின்றோம்.
•    ஆங்கிலத்தில் இக்காற்று மான்சூன் என்று அழைக்கப்படுகின்றது. இவ்வார்த்தை மௌசிம் என்ற அரேபிய வார்த்தையிலிருந்து பெறப்பட்டதாகும். சில பகுதிகளில் வளிமண்டல அழுத்தம் பருவத்திற்கேற்ப மாறுவதால், பருவக்காற்றுகளை தோற்றுவிக்கின்றது.
•    இந்தியா, தென்கிழக்கு ஆசியா மற்றும் வட ஆஸ்திரேலியா போன்ற நாடுகள் பருவக் காற்றினால் மழையைப் பெறுகின்றன.
•    சில காற்றுகள் ஒரே நாளில் தன் திசையை மாற்றிக்கொண்டு எதிர்திசையில் வீசுகின்றன. இதற்கு காரணம், ஒரே நாளில் அருகருகே உள்ள இரு பரப்புகளுக்கு இடையே ஏற்படும் காற்றழுத்த வேறுபாடுதான். நிலமும் கடலும் சேர்ந்த பகுதிகளிலும், மலையம் பள்ளத்தாக்கு கொண்ட பகுதிகளிலும் இத்தகைய காற்றுகளைக் காணலாம்.

1. கடல் காற்று
•    நீர்பகுதியைக் காட்டிலும் நிலப்பகுதி விரைவில் வெப்பத்தை எடுத்துக் கொள்ளும். பகல் நேரத்தில் நிலம் வேகமாக வெப்பமடையத் தொடங்குகின்றது. 

•   எனவே நீர்ப்பரப்பைக் காட்டிலும் நிலப்பரப்பு அதிக வெப்பமாக உள்ளது. எனவே வெப்பம் அதிகமாக உள்ள நிலப்பரப்பில் குறைவழுத்தம் உருவாகின்றது.

•   அதே சமயம் வெப்பம் குறைவாகவுள்ள நீர்ப்பரப்பில் அதிக அழுத்தம் உருவாகின்றனது. எனவே பிற்பகலில் அதிக காற்றழுத்தமுள்ள நீர்பரப்பில் இருந்து குறைந்த காற்றழுத்தமுள்ள நிலப்பரப்பை நோக்கி காற்று வீசுகின்றது. இதனைக் கடல் காற்று என்கிறோம்.
•    கடல் காற்றினால் கரையோரப் பகுதியில் பிற்பகல் வெப்பம் தணிக்கப்படுகின்றது.

2. நிலக்காற்று
•    சூரியன் உதித்ததும் நிலம் வெப்பமடைய துவங்குவது போல "சூரியன் மறைந்ததும் நிலம்" மிக வேகமாக வெப்பத்தை இழக்கின்றது. ஆனால் நீர்ப்பரப்போ மிக மெதுவாக வெப்பத்தை இழக்கக் தொடங்குகிறது.

•   இதனால் நள்ளிரவில் நிலப்பரப்பு மிகவும் குளிர்ச்சியாகவும், நீர்ப்பரப்பு நிலப்பரப்பை விட வெப்பம் அதிகம் உள்ளதாகவும், இருக்கின்றது.
•    எனவே வெப்பம் அதிகமாக உள்ள நீர்ப்பரப்பில் குறைந்த காற்றழுத்தமும் வெப்பம் குறைவாக உள்ள நிலப்பரப்பில் அதிக காற்றழுத்தமும் உண்டாகின்றது.

•   இவ்வழுத்த மாறுபாட்டின் காரணமாக காற்று நிலப்பகுதியிலிருந்து நீர்ப்பரப்பை நோக்கி நள்ளிரவுக்குப் பிறகு வீசுகின்றது. இக்காற்று நிலக்காற்று என அழைக்கப்படுகின்றது.