காலநிலையியல் (Climatology) - புவியின் வெப்ப மண்டலங்கள் பகுதி 2

காலநிலையியல் (Climatology) - புவியின் வெப்ப மண்டலங்கள் பகுதி 2

வெப்ப வேறுபாடு மண்டலங்களுக்கு இடையில் மட்டும் காணப்படுவதில்லை. ஒரே அட்சத்தில் அமைந்துள்ள இடங்களுக்கு இடையில் வெப்ப வேறுபாடு காணப்படுகின்றது. இதற்கான காரணங்கள் பின்வருவன.
 

1. கடல் மட்டத்திலிருந்து உயரம்
•    கடல் மட்டத்திலிருந்து உயர செல்லச் செல்ல 1000 மீட்டருக்கு 6.5 சதவீதம் வெப்பம் குறைந்து கொண்டே செல்கின்றது. எனவே ஒரிடத்தின் வெப்பம், அவ்விடம் கடல் மட்டத்திலிருந்து எவ்வளவு உயரம் உயர்ந்துள்ளதோ அதைப் பொறுத்து அமையும்.

•    ஒரே அட்சத்தில் இருந்த போதிலும் சென்னையில் வெப்பம் அதிகமாகவும் பெங்களுரில் குறைவாகவும் உள்ளது.

2. கடலிலிருந்து தூரம்
•    கடற்பரப்பிற்கு அருகில் அமைந்துள்ள இடங்கள் தினமும் பிற்பகல் வேளைகளில் கடற்காற்றைப் பெறுகின்றன.

•    கடற்காற்றின் வெப்பநிலை அக்காற்று வீசும் இடங்களின் வெப்பநிலையை விடக் குறைவாக இருக்கின்றது. எனவே கடற்காற்றினைப்பெறும் இடங்களின் வெப்பநிலை கடற்காற்றினால் குறைகின்றது. 

•    கடற்கரையோரங்களில் அமைந்துள்ள இடங்களின் வெப்பநிலை, கடற்கரையோரங்களிலிருந்து வெகு தொலைவில்
அமைந்துள்ள இடங்களின் வெப்பநிலையை விடக் குறைவாக உள்ளது.

3. வீசும் காற்றுக்கள்
•    ஓரிடத்தில் வெப்பநிலை, அவ்விடத்தினை நோக்கி வீசும் காற்றினால் நிர்ணயிக்கப்படுகின்றது. வெப்பக்காற்று அது வீசுகின்ற பகுதியிலுள்ள இடங்களின் வெப்பத்தை அதிகப்படுத்துகின்றது.

•    அதே போன்று குளிர்ந்த காற்று அது வீசுகின்ற பகுதியிலுள்ள இடங்களின் வெப்பத்தைக் குறைக்கின்றது.

4. புவியின் மேற்பரப்பு
•    பனிப்படர்ந்த பகுதிகளில் சூரிய ஒளிபடும்போது, பெரும்பகுதி பிரதிபலிக்கப்படுகின்றது. எனவே, அங்கு வெப்பம் குறைகின்றது. மணற்பாங்கான இடங்கள் வெப்பத்தை அதிகம் ஈர்க்கும் சக்தி கொண்டவை. எனவே தான் பாலைவனங்களில் பகல் வேளைகளில் அதிக வெப்பம் நிலவுகின்றது.

5. கடல் நீரோட்டங்கள்
•    கடற்கரையோரப் பகுதிகளின் வெப்பநிலை அப்பகுதியை ஒட்டியுள்ள கடல் நீரோட்டங்களினால் பாதிக்கப்படுகின்றது. கடற்கரையோரப் பகுதிகள் வெப்பநீரோட்டத்தால் வெப்பத்தையும், குளிர்ந்த நீரோட்டத்தால் குளிர்ச்சியையும் பெறுகின்றன.

•     உதாரணமாக பிரிட்டீஷ் தீவுகளின் கடற்கரைப் பகுதிகள், வெப்ப நீரோட்டத்தினால் வெப்பமடைகின்றன. இவற்றின் வெப்பம் அருகிலுள்ள மற்ற இடங்களின் வெப்பத்தைக் காட்டிலும் சற்று அதிகமாகவே உள்ளது.

6. சரிவு
•    வட அரைக்கோளத்திலுள்ள மலைகளில் வடக்கு நோக்கி சரிவினைக் கொண்ட மலைகளும், தென் அரைக்கோளத்திலுள்ள மலைகளில் தெற்கு நோக்கி சரிவினைக் கொண்ட மலைகளும், சூரிய ஒளியை அதிகம் பெறுவதில்லை. எனவே இங்கு வெப்பம் குறைவு. 

•    மாறாக வட அரைக்கோளத்தில் தெற்கு சரிவினையும் தென் அரைக்கோளத்தில் வடக்கு சரிவினையும் கொண்ட மலைப்பகுதிகளில் சூரிய ஒளி நன்கு படுவதால் இங்கு வெப்பம் சற்று அதிகமாக உள்ளது.